ایل او سی پر دراندازی کے بھارتی الزامات جعلی آپریشن کے ایجنڈے کا تسلسل ہیں، وزیراعظم

وزیراعظم عمران خان نے ایک مرتبہ پھر خبردار کیا ہے کہ لائن آف کنٹرول پر دراندازی کے بھارتی الزامات جعلی آپریشن کے ایجنڈے کا تسلسل ہیں۔

سماجی رابطے کی ویب سائٹ ٹوئٹر پر کیے گئے ٹوئٹ میں وزیراعظم عمران خان نے دنیا کو خبردار کرتے ہوئے کہا کہ بھارت، پاکستان کو جعلی آپریشن کا نشانہ بنانے کے لیے بہانے تلاش کرنے کی کوششیں جاری رکھے ہوئے ہے۔

انہوں نے کہا کہ بھارت کی جانب سے لائن آف کنٹرول پر دراندازی کے حالیہ الزامات اسی خطرناک ایجنڈے کا تسلسل ہیں۔

ایک اور ٹوئٹ میں وزیراعظم عمران خان نے کہا کہ بھارتی قبضے کے خلاف کشمیریوں کی مزاحمت بھارت کی جانب سے کشمیریوں پر ظلم و بربریت کا براہ راست نتیجہ ہے۔

انہوں نے کہا کہ آر ایس ایس اور بھارتیہ جنتا پارٹی (بی جے پی) کی مشترکہ فاشسٹ پالیسیاں خطے کے لیے سنگین خطرہ ہیں، بین الاقوامی برادری لازمی کارروائی کرے اس سے قبل کہ بھارت کے غیر ذمہ دارانہ اقدامات جنوبی ایشیا میں امن و سلامتی کو خطرے سے دوچار کرے۔

اپنا تبصرہ بھیجیں