جامعہ این ای ڈی کے طلبہ کے لئے اچھی خبر، فیسوں میں 20 فیصد رعایت اورہاسٹل فیس نہیں لینے کا فیصلہ ۔

کراچی ،ویب ڈیسک

جامعہ این ای ڈی کے طلبہ کے لئے اچھی خبر سامنے آگئی ہے،کورونا وائرس کے پیش ِنظر این ای ڈی یونیورسٹی نے طلبہ کی فیسوں میں 20 فیصد رعایت کا فیصلہ کرلیا ہے۔

این ای ڈی یونیورسٹی کے وائس چانسلر ڈاکٹر سروش لودھی نے کہا کہ طلبہ سے ہاسٹل کا کرایہ بھی وصول نہیں کیا جائے گا، اس بات کا اندازہ ہے کہ کورونا وائرس سے لوگوں کے کاروبار اور نوکریاں متاثر ہوئی ہیں، اسی لئے والدین کو ریلیف دینے کا فیصلہ کیا ہے۔

سروش لودھی کا کہنا تھا کہ جامعہ مالی خسارے کا شکار ہے، اس کے باوجود طلبہ کو ریلیف دے رہے ہیں، اس ماحول میں لوگوں کو آگے بڑھ کر ایک دوسرے کی مدد کرنی چاہئے اور جامعہ این ای ڈی کے طلبہ کو ہر ممکن سہولت فراہم کریں گے۔

یاد رہے چند روز قبل کو وِڈ 19 وبا کے دوران پاکستان بھر میں پبلک سیکٹر جامعات میں پہلا ویڈیو لنک اجلاس منعقد ہوا تھا ، یہ جامعہ این ای ڈی کا اٹھائیسواں سینیٹ اجلاس تھا ، جس کی صدارت نثار کھوڑو نے کی۔

انھوں نے کہا تھا کہ سندھ کی تمام جامعات میں طلبہ کے داخلے اوپن میرٹ پر ہونے چاہیئے، اگر داخلے اوپن میرٹ پر ہو رہے ہیں تو پھر داخلوں کے لیے کراچی اور سندھ کا لفظ اور یہ ٹرمنالوجی استعمال نہیں ہونی چاہیے، تعلیمی اداروں میں کوالٹی ایجوکیشن اور ریسرچ کے ذریعے ہی دنیا کا مقابلہ کیا جا سکتا ہے۔

جامعہ این ای ڈی کے پرو چانسلر اور مشیر جامعات و تعلیمی بورڈز نثار کھوڑو کا کہنا تھا کہ سستے داموں وینٹی لیٹرز کی تیاری این ای ڈی کا کارنامہ ہے۔

اپنا تبصرہ بھیجیں