وزیراعظم نے ملک میں بڑھتی ہوئی مہنگائی کا سختی سے نوٹس لے لیا


اسلام آباد (ویب ڈیسک) وزیراعظم نے ملک میں بڑھتی ہوئی مہنگائی کا سختی سے نوٹس لے لیا ہے۔ وزیراعظم نے انتظامیہ کی جانب سے اشیاء خورد و نوش کی قیمتوں میں غیر معمولی اضافے کو کنٹرول کرنے میں ناکامی کا نوٹس لیتے ہوئے متعلقہ حکام کو فوری اقدامات کرنے کی ہدایت کردی ہے۔ وزیرِاعظم آفس نے تمام صوبائی چیف سیکرٹریز اور چیف کمشنر اسلام آباد کو مہنگائی کی روک تھام کے لیے فوری اقدامات کرنے کی ہدایت کی ہے۔ مراسلے میں مہنگائی، ذخیرہ اندوزی اور بد عنوانی کی روک تھام کے لیے خصوصی مہم شروع کرنے کی ہدایت کی گئی ہے۔ وزیرِاعظم آفس کی جانب سے جاری مراسلے میں کہا گیا ہے کہ عوام کو ریلیف فراہم کرنا فیلڈ انتظامیہ کی بنیادی ذمہ داری ہے تاہم متعلقہ عملداروں کے درمیان باہمی روابط کا فقدان عام آدمی کے لیے مشکلات بڑھا رہا ہے۔ وزیراعظم عمران خان نے ہدایت کی ہے کہ قیمتوں کے کنٹرول کے قوانین پر مؤثر عمل درآمد کے لیے فوری لائحہ عمل تشکیل دیا جائے۔ وزیراعظم عمران خان نے متعلقہ اداروں کو ہدایت کی ہے کہ قیمتوں میں بلا جواز اضافہ کرنے والے عناصر کے خلاف کارروائی کی جائے اور ذخیرہ اندوزی کے خلاف سخت اقدامات عمل میں لائے جائیں۔

اپنا تبصرہ بھیجیں